Bondye Papa nou ki anwo nan syèl la ki gen tout otorite, pwisans, pouvwa, ak dominyon sou tout bagay ki pa janm dòmi.
Bondye ki kreye ni mond vizib ak mond envizib la pou pwòp glwa-L’, pou eksprime grandè-L’ kòm Bondye siprèm inivè-a ki san parèy. Bondye ki pa gen lòt devan-L’, akote-L’, ak dèyè-L’. P’ap janm gen tankou-L’.
Bondye ki kreye tout bagay pou Pitit Li Jezi Kris e ki bay Jezi yon otorite siprèm sou tout bagay ki egziste. Bondye ke anyen pa janm echape anba kontwòl Li.
Bondye ke anyen pa janm pran-L’ pa sipriz. Bondye k’ap renye sou tout inivè-a ak yon otorite ak pwisans nan men-L’ ki absoli e ki san limit.
Yon otorite ke dyab paka ni ranvèse, reziste, ak twonpe. Bondye ke ènmi-an paka pase anba fil fè yon fason pou-l’ twonpe vijilans Ou.
Bondye ke prezans ak grandè-L’ si tèlman imans e reyèl tout kote, inivè-a menm twò piti pou-l’ kenbe prezans Li. Bondye ki chita sou twòn ki pi wo pase tout twòn.
Bondye ke kote Ou syeje sou twòn Ou-an domine sou mond fizik la ak mond kote dyab la ak tout akolit yo ap fonksyone.
Pa gen anyen ki ka manifeste nan mond fizik la si-W’ pa pèmèt li. Bondye k’ap kontwole tout aktivite dyab la. Bondye ki fè sa-L’ vle, tout kote-L’ vle, lè-L’ vle, ak jan-L’ vle kit li se nan syèl la, sou tè-a, anba lanmè, ak anba tè.
Mwen ba Ou tout glwa, lonè, ak louwanj Ou menm sèl merite pou grandè-W’ ak fidelite-W’.
Ebyen, nan tout otorite ak pwisans ke Ou gen nan men-W’ ki p’ap janm ka epwize ke Ou envesti ban Pitit Gason-W’ Jezi Kris ke-W’ bay Kretyen yo aksè a li menm an Kris pou yo detwi zèv dyab la, m’ pran otorite sou tout kalite konplo ki ranje kont mwen kit li mistik ou imen, sou tout zam, sou asid y’ap voye nan figi moun, sou tout plan ènmi-an, sou tout zak kidnapping, sou tout demon ki alabaz konplo sa yo.
Papa, fo-m’ fe refleksyon sa yon fason pou-m’ ka depann sou pwoteksyon-W’ ak yon fem konfidans. Menm jan ke-m’ ka depann sou pwoteksyon-W’ kont atak spirityel ke enmi-an ap lanse toutotan ke-m’ rete nan limit ke-W’ ban mwen-an se konsa ke-m’ ka depann sou pwoteksyon-W’ kont atak fizik tou.
Paske atak spirityel pi terib. Atak spirityel ap evolye nan yon dimansyon ki pi avanse pase domen kote atak fizik ap evolye. Zam spirityel pi terib pase zam fizik.
Zam fizik pa ka kanpe devan zam spirityel. Pa gen okenn lame lom ki ka kanpe kont yon lame espri.
Ebyen, m’ kòmande echèk, anbago, deblozay, avègleman, blokaj, reta, konfizyon, ak egareman total kapital nan non Jezi. M’ kòmande echèk kont tout krim kont mwen nan non Jezi.
Tout vye zak lòm lan ap komèt kòmanse nan de sous sa yo: panse ak santiman. Yo youn sanse jwe sou lòt atravè yo Satan enfliyanse lòm lan.
Tout konplo malefik, destriktif ki gentan planifye deja oubyen ki an mosyon sou plan astral ak nan panse lòm lan kont mwen ki poko manifeste nan mond fizik la, m’ kòmande echèk ak destriksyon nan non Jezi.
Tout sa-k’ gen tan fet pandan lanwit kont mwen ki gen pou manifeste pandan lajounen se pou yo echwe nan non Jezi. Tout espri malefik ki an mosyon astral k’ap tann opòtinite pou yo ka frape-m’, gaye nan non Jezi.
Konfesyon
– Genyen yon Franmason ki di gen pawol ke-w’ pwononse avan-w’ soti, te met gen tout kalite deblozay ak dezod k’ap fet, moun ap mouri, kanta pou retounen lakay ou, ou pa ka pa retounen.
Yon moun te met ap chache-w’ ak zam pou-l’ touye-w’, gen pawol ke-w’ pwononse, kanta jwenn ou-an, se bliye sa.
Gen pawol ke-w’ pwononse, menm si yo te ba ou pwazon, menm si yo te monte yon lamen pou ou, yo p’ap janm ka atenn ou.
Gen pawol ke-w’ site sou machin ou, non selman yo paka vole machin lan, men kelkeswa bagay ke-w’ te kite nan machin lan, vole pa ka pran-l’.
– Yon gwoup moun ki t’ap mache ansanm, nan kapasite mistik yo sou pakou-a, yo gen tan we yon gwoup vole k’ap tann yo. Le yo rive, yo pwononse yon pawol selman, yo tout tounen kabrit. Yo netralize yo tout ak yon pawol mistik.
– Gen priye ke-w fe le ou ap soti menm si ta pral genyen yon deblozay ki ta pral pete, se le-w’ fin pase pou sa rive fet. Priye-a sanse retade tout sa ki ta pral dewoule nan zon lan pou yon moman.
Gen priye ke-w’ fe si-w’ gen yon kob sou ou, menm si zon ou ap pase-a te chaje vole, menm si vole te met ap fouye moun, pran zafe moun, men kanta pran lajan sa-k’ sou ou-a, sa pa ka fet.
– Gen fason ou ka kreye yon mas enejetik ki rann ke atak fizik ak spirityel pa ka atenn ou.
– Gen pawol ki rann zam ak kouto vin inefektif.
– Gen yon answen satanis ki konfese yo konn krible-l’ ak katouch, an retou li pran grenn katouch yo li bay ajan milite ki tire sou li yo. Yo tout pete kouri a sezisman.
– Anplis, gen yon dam ki t’ap sevi gwo dyab, yo eseye rantre machin sou li pou yo te fini ave-l’. Tout moun panse machin lan kraze-l’, men se gade yo gade yo we-l’ lotbo lari-a. Gen yon entevansyon ki fet ki epanye-l’ de aksidan.
– Gen yon homme mistik anko ki bay jan ke-l’ bloke zam de vole ki t’ap pral eseye vole yon motosiklet nan men yon moun ki t’ap mennen-l’ yon kote.
Te gen twa moto ki t’ap pouswiv yo. Kapasite mistik misye gen tan di-l’, gen yon moun senp k’ap chache lavi-l’. Lot de yo se 2 vole ke yo ye. Le yo fe yo ti ralanti, neg senp ale.
Men lot de yo jis senen yo. Yo rale zam sou met moto-a pou-l’ bay kle-a, misye ki te chita deye chofe-a deklare an gran jan ke kle-a p’ap bay, e misye peze men chofe-a jis nan degre-l’ pran kle-a nan men-l’ pou-l’ ensiste kle-a p’ap bay telman misye kwe nan reset mistik ke-l’ gen tan fe ki rann li bloke gachet zam sa yo.
Menm vole yo etone le yo we sa. Yo komanse mande kisa misye ye. Misye pran moto-a, chofe-a oblije ak tout laperez monte deye-l’, epi misye vire do-l’ li ale. Li mete neg yo kanpe pou 2 ed tan sou pye yo san yo pa ka ale atrave yon Pawol ke-l’ site.
Bondye ki gen tout pouvwa k’ap renye nan syèl la, Bondye ki se sous tout otorite, pwisans, ak dominyon:
-
- Si gen gwo priyè oubyen enkantasyon mistik ke moun k’ap sèvi dyab fè pou yo kreye yon kouvèti oubyen yon mas enèjetik pou pwoteje yo kont tout atak fizik tankou bal, asid, manchèt, kouto, aksidan, ansanm ak atak spirityèl,
-
- Si gen gwo kokennchenn pawòl vibratwa ke moun ki nan mistik pwononse pou proteje tèt yo kont zak kidnaping, pwazon, lanmen monte, ak machin yo,
- Anplis, si gen gwo priye pwoteksyon pou yo fe ki retade yon deblozay ki te gen pou fet jiskaske moun ki fe priye-a fin pase kote sa.
Si Satan ke pwisans li limite k’ap fonksyone anba otorite-W’ ka pèmèt yon seri moun fè sa yo, sa se evidans ke Ou ka fè plis ke sa-a toujou nan non Jezi pa pwisans Lespri Sen-W’ ki san limit.
M’ konnen ke pwoteksyon dyab la bay pa gen yon garanti ki a 100 pousan. Dyab la ka pwoteje nan degre Ou pemet li pwoteje paske misye ak tout aktivite l’ap mennen anba kontwol Ou. Eskiz dyab la toujou bay le yon bagay rive ke-l’ te sipoze anpeche-l’ fet: si-m’ te la, chwal mwen pa t’ap mouri.
Men sa ki atire atansyon-m’, se fem konfidans, asirans, ak depandans ke moun k’ap sevi-l’ yo genyen nan efikasite pwoteksyon ke yo jwenn nan men Satan atrave gwo pawol enkantasyon ke y’ap pwononse telman yo kwe nan efikasite pratik sa yo malgre gen yon gwo limitasyon nan pwisans ki nan priye sa yo.
Yo kwe nan priye sa yo akoz yo jwenn bon rezilta. Chache pwoteksyon se youn nan koz ki kreye yon kokenchenn swafte nan yo anve degre.
Menm le Ou pa fonksyone menm jan ak Satan, men si dyab la atrave kapasite-l’ ki limite ka fe tout sa yo, Ou ka fe plis ke sa toujou.
Paske tout kapasite kit li fizik, metafizik, spirityèl, tout mwayen ke lòm oubyen movèz espri yo ap itilize pou yo fè anpil mal sou tè sa-a ni sou plan astral ak fizik se Ou menm ki te ba yo l’ pou yo te kapab glorifye non-W’ ki sen.
Ou te ba yo-l’ pou yo te itilize-l’ byen, men yo chwazi pou yo itilize yo mal nan figi-W’ tankou Ou pa-t’ janm egziste pou yo menm.
Tout zam ki egziste kit li fizik oubyen spirityèl, materyèl oubyen eleman ki fè zam sa yo, lwa oubyen konsèp ki itilize pou fè zam sa yo, se Ou menm ki te kreye yo.
Ni Satan ni lòm, yo poko janm kreye anyen nouvo. Dayè, yo pa gen anyen nouvo ke yo ka kreye tou paske se kopyadò ke yo ye. Se lwa fizik, metafizik, natirèl, oubyen spirityèl ke Ou kreye ke yo dekouvri.
Atravè nati pèvèsyon ak mechanste ki nan yo menm, yo sèlman chwazi pou yo itilize bagay ke Ou te kreye nan yon fason ki ale kont rezon inisyal ke Ou te kreye yo.
Se yon mank respè ke-l’ ye, se mank dega ke-l’ ye tou lè Ou ap gade nan ki eta oubyen nan ki mezi malefik ke movèz espri sa yo k’ap enfliyanse lòm ap itilize lwa ak prensip ke-W’ te inisye nan inivè-a.
Se rezon sa-k’ fè ke Ou rayi tout vye zak ke y’ap komèt. Gen yon jou k’ap vini, Ou gen pou ramne yo tout nan yon jijman tèrib kote kòlè-W’ gen pou vide sou yo san mezi pou tout sa ke yo te fè.
Tout spas oubyen domèn ke y’ap fonksyone kit li fizik oubyen spirityèl, vizib oubyen envizib, natirèl oubyen sinatirèl, kit li se nan dezyèm syèl, sou tè sa-a, anba tè, ak anba lanmè, yo tout nèt te kreye pa Ou menm pou pwòp glwa-W’.
Anplis, se Ou menm ki soutni tout domèn sa yo ak gwo pwisans Ou. Ebyen, sa ban mwen yon fèm asirans non sèlman ke Ou gen kontwòl sou tout bagay, men Ou gen tout kapasite ak gwo pouvwa anba men-W’ pou Ou demoli ak ekraze konplètman plan mechan ak tout vye zam ke y’ap itilize pou yo fè mal.
Non sèlman sa, tout sa ki egziste depann de pwisans kreyatif Ou ki an mosyon, ki aktif, oubyen k’ap vibre nan tout sa ke-W’ te kreye.
Men gen yon lot dimansyon pwisans ke Ou te mete pou demere nan kreyati-a pou pèmèt li akonpli volonte-W’. Ebyen, Satan ak tout akolit li yo pèdi aksè ak pwisans sa-a. Yo vin tonbe jouk anba nan labim. Eta deplorab kote yo tonbe-a vin rann ke y’ap vibre a yon frekans ki trè ba.
Yo vin rete sèlman ak kapasite de baz ke-W’ te mete nan yo ak pwisans kreyatif Ou-a lè-W’ t’ap kreye yo pou ki te pemet yo fonksyone kom zanj.
Ebyen, se menm kapasite sa yo ki vin souye oubyen kowonpi pa eta yo vin tonbe ke y’ap itilize devan dèyè oubyen alanvè pou yo reziste volonte-W’.
Men tout kapasite sa yo sanse limite. Ou bay lòm lan gran privilèj pou-l’ kapab gen aksè ak gwo kokennchenn pwisans ki pi wo pase tout pwisans dyab la genyen.
Kidonk, dyab la ak tout akolit li yo se anba pye Kretyen-an yo ye.
May blessings, praise, wealth, glory, wisdom, greatness, dominion, thanks, honor, power, reverence, exaltation, might, majesty, sovereignty and strength be to our Father God who sits on the throne forever and ever and to Christ Jesus who sits on His right hand at the place of honor whom the glorious Father withholds nothing, through whom the Father created everything, and whom everything was created for.
To God the Father be glory and absolute dominion forever and ever and to the Lamb. Amen