Senyè Bondye, m’ p’ap priye-W’ selon yon konesans sipefisyèl oubyen plat de Ou menm. Oubyen selon konesans kouran ke anpil moun gen de Ou menm ke yo souvan pran-W’ konsa, konsa jis nan degre yo pa vrèman pran an konsiderasyon sa ke-W’ ye an esans.
Yo kite pwoblèm, difikilte lavi, oubyen reyalite negatif ki antoure vi yo sèvi yo kòm yon obstak konsènan konprann ak anbrase grandè-W’ ki enfini.
Grandè-W’ se yon bagay yo tande-l’ tou tan, yo li-l’ nan Pawòl Ou, yo ka wè-l’ eksprime atravè sa ke-W’ fè atravè mond materyèl sa ke-W’ kreye, men yo poko janm ka vrèman sezi-l’ nan yon nivo pèsonèl jan ke-W’ vle pou yo fè sa.
Anplis, anpil moun sanse adopte yon konesans ki trè pasif de Ou menm. Gen yon depandans ke-W’ bezwen nan yo menm ke yo poko vrèman egzèse-l’ nan Ou.
Yo vin tèlman abitye ak lapriyè jis nan degre-l’ pèdi enfliyans li sou lavi yo. Li vin devni yon bagay yo fè pa routin kote fokis la baze plis sou yon sèten obligasyon ke anpil santi ke yo dwe priye pandan ke fokis yo te sipoze plis baze sou pwisans ki gen nan lapriyè.
Se youn nan bagay ki lakòz anpil neglijans nan lavi Kwayan nan domèn sa. Lapriyè vin devni yon aktivite ki parèt annwiyan akòz se prèske menm bagay la ke y’ap mande pandan ke rezilta ke yo jwenn yo pa vrèman an amoni ak rekèt ke y’ap fè. Le y’ap priye se tankou se yon Bondye ki trè lwen ke y’ap priye pandan ke prezans Ou te gen tan la avan menm yo adrese priyè yo anvè-W’.
God isn’t far away from us as we may feel since He is in the midst of His children.
Pafwa, gen yon vye kwayans k’ap sikile anba chal nan panse yon seri Kwayan ki menm rive fè yo konprann priyè se yon tan pèdi paske yo kite reyalite ke yo ka pèsevwa atravè 5 sans yo detèmine konsepsyon oubyen kwayans yo konsènan enpòtans ak pwisans lapriyè.
Pandan ke esans lapriyè baze sou reyalite ke lòm lan paka ni wè oubyen pèsevwa-l’ atravè 5 sans li ki konekte-l’ a mond fizik sa. Lapriyè baze sou yon reyalite ki pa fè okenn sans ditou a lòm lan. Kidonk, lè-w’ santi bagay yo plis pa fè sans pou ou, se lè sa menm pou lapriyè. Fondasyon lapriyè baze sou konekte lavi-w’ ak Bondye yon fason pou pwisans Li ka demere nan lavi-w’.
Ebyen, m’ vle adrese-W’ nan yon fason ki pran an konsiderasyon vrè esans Ou kòm Kreyatè siprèm inivè-a, sous oubyen orijin tout sa ki egziste, ansanm ak Sila ki kenbe tout eleman ki konstitiye tout inivè sa-a ansanm. Latè-a pa menm reprezante yon ti “pwen” konpare ak vas inivè sa-a ke-W’ te kreye ak Pawòl Ou.
Sila ke anyen pa ka fèt san pèmisyon-L’. Sila ke menm gwo pwisans sa-a ki te manifeste pandan Ou t’ap kreye tout bagay, se menm pwisans sa-a ki toujou aktif nan kenbe tout bagay nan plas yo. Sila k’ap domine sou tout bagay ak yon otorite ak pwisans ki san limit.
Anpil moun pale de yon enèji oubyen fòs, men se pwisans kreyatif Ou k’ap aji, vibre, anime, oubyen ki abite tout sa ki egziste.
Tout sa ke-W’ kreye konekte ak gwo pwisans sa-a. Tout bagay ap evolye nan inivè-a atravè pwisans sa-a. Strikti fondamantal oubyen fondasyon egzistans tout bagay depann sou pwisans sa-a.
Ebyen, m’ vle monte nan yon lòt dimansyon nan fason ke-m’ konprann grandè-W’ ki san limit. Kidonk, m’ap priye-W’ nan yon lòt pèspektif ki an amoni ak tout sa ke m’ aprann de Ou menm atravè pawòl Ou.
Fason ke-m’ panse ka enfliyanse jan ke-m’ konprann Ou e ki ka menm enpoze yon limitasyon sou sa ke-m’ ka atann de Ou menm. An retou, k’ap afekte nan ki dimansyon Ou ka aji nan lavi-m’.
I AM WHO I AM. I AM ALL THAT I AM BECAUSE OF NOTHING EXTERNAL SINCE I AM EVERYTHING.
Sa-W’ ye pa depann sou anyen paske egzistans Ou depase tout bagay ki te ka janm egziste. Egzistans Ou te gen tan etabli etenèlman depi avan tout bagay te jwenn egzistans yo. Kidonk, egzistans Ou rann tout sa ki te ka egziste inesesè.
Ou pa bezwen anyen pou-W’ ye sa ke-W’ deja ye an plen oubyen sa ke-W’ deja ye endepandan de tout bagay ki egziste. Egzistans Ou pa depann de anyen. Ou pa bezwen anyen pou depann sou li yon fason pou Ou ka sipòte tèt Ou.
Egzistans Ou pa baze sou okenn lòt eleman an deyò oubyen endepandan de Ou menm ki vin konstitiye sa ke-W’ ye paske Ou gen tout kapasite ki fè sa ke-W’ ye-a nan Ou. Egzistans Ou pa gen kòz, li pa gen orijin.
Se Ou menm ki orijin ak kòz tout sa ki egziste. Tout sa ki egziste depann de Ou menm. Egzistans yo tout ap evolye selon jan-W’ te planifye-l’.
Si tout sa ki egziste pa ta egziste ankò, sa p’ap chanje anyen nan sa ke-W’ ye paske egzistans Ou pa depann de yo.
Ou tout sa-W’ ye-a, pa gen yon ‘paske’ ladan-l’ ki gen pou wè ak yon kòz ki pa deyò de Ou menm ke-W’ konekte sou Li yon fason pou-W’ tire de li memm yon eleman ki esansyèl pou-W’ soutni tèt Ou.
Avan tout bagay te, Ou sa-W’ ye-a. Ou tout sa ke-W’ ye-a san anyen.
Depi nan letènite avan menm Ou te kreye tout bagay, Ou se Bondye siprèm ki gen tout pouvwa. Ou se Bondye grandè-W’ san mezi.
Ou omnisyan, omnipotan, ak omniprezan. Kidonk, 3 gran atribi sa yo vin sèvi kòm 3 pilye atravè yo menm Ou kreye tout bagay. 3 gran atribi sa yo te gen tan kouvri tout dimansyon tan, spas, ak matyè ki konpoze mond materyèl la avan menm Ou te kreye-l’.
Glwa-W’ ki se esans sa ke-W’ ye pa nati te toujou ap manifeste. Ou chwazi selon pwòp souvrente-W’ pou kreye tout sa ki egziste yon fason pou-W’ eksprime glwa sa ki te toujou demere nan Ou depi nan letènite. Kreyasyon-an se yon ekspresyon grandè-W’.
Trè enpòtan: Ebyen, m’ ouvri pòt panse-m’ ak pòt kwayans mwen byen laj nan yon degre ki ba-W’ chans pou Ou kapab ye nan lavi-m’ tout sa-W’ ye an esans ki baze sou grandè-W’ ki enfini yon fason pou Ou ka fè tout sa Ou vle fè pou avanse wayòm Ou sou tè sa-a kont wayòm dyab la k’ap vale tèren.
Menm jan ke glwa-W’ ki baze sou montre kòman-W’ gran se motivasyon-W’, detèminasyon-W’, ak objektif Ou nan tout sa Ou ap fè, se konsa tou motivasyon-m’, detèminasyon-m’, ak objektif final mwen se egzalte, glorifye, ak manifye grandè-W’ atravè fè yon gwo Bondye tankou-W’ parèt gran nan lavi-m’ atravè tout sa m’ap fè pou glwa-W’ ka manifeste nan lavi-m’.
M’ap atann pou-W’ egzèse gwo pwisans Ou nan lavi-m’ ak atravè ministè-m’. M’ konekte-m’ ak reyalite ke-W’ se Bondye k’ap renye sou tout bagay ki egziste toutan ak yon otorite absoli.
Otorite sa-a anglobe tout inivè-a nan yon degre kote anyen paka echape kontwòl Ou. Kote-W’ syeje nan syèl la se sant tout otorite ak pwisans. Ebyen, tout sa ke-W’ kreye se yon ekstansyon oubyen manifestasyon de pwisans Ou.
Atravè gras Ou pou limanite, Ou agreye kwayan yo bèl opòtinite pou yo syeje a dwat Ou sou twòn Ou an Kris.
Jezi Kris ki se Ajan atravè-L’ Ou akonpli tout volonte-W’. Ou ba-L’ pwòp non-W’, non sa ki kreye inivè-a, Ou delege tout otorite ni nan syèl la ak sou tè sa-a nan men-L’.
An Kris, Ou mete yon otorite ak pwisans disponib a nou menm ki depase tout lòt pwisans ki egziste ke dyab la pa gen aksè a li menm. Ou mete dyab la anba pye nou.
Pwisans sa-a se yon danje oubyen pwazon ke-l’ ye pou kan dyab la. Anplis, pase tan avè-W’ nan lapriyè pèmèt Ou manifeste prezans ak pwisans Ou nan lavi-n’ ki vin mete yon lòt dimansyon anksyon nan lavi-n’.
Prezans manifeste sa se yon lòt dimansyon prezans ki pa manje anyen frèt. Se yon prezans ki p’ap tolere enfliyans oubyen prezans dyab kote l’ap manifeste.
Se yon prezans ki toujou prè pou-l’ atake ak detwi tout vye fòs demonyak ki prezan. Se yon prezans tou ki kase tout vye chèn peche ki kenbe lòm an kaptivite.
Menm jan yon moun p’ap pran chans rantre nan yon kay ki anvayi pa dife, se menm jan tou yon movèz espri p’ap pran chans opere nan yon andwa kote prezans Ou ki manifeste kòm yon dife ap opere.
Pwisans Bondye
Pwisans Bondye ki enfini, ki san limit, e ki san mezi se yon eleman ki gen plizyè dimansyon. Sa-k’ pral pèmèt ou kapab navige diferant dimansyon ki gen nan pwisans Bondye se konesans ou genyen konsènan Pawòl Li konsènan grandè-L’ ki se yon ekspresyon glwa-L’.
Se konesans ke-w’ genyen ki pral pèmèt ou penetre pwofondè Bondye. Fason ou konprann pwisans Bondye, pèspektif ou, mantalite-w’, oubyen kwayans ou konsènan grandè-L’ gen yon gran wòl y’ap jwe nan fason ke ou ka egzèse lafwa-w’ nan Li.
Dimansyon lafwa ke-w’ ka egzèse nan Bondye baze sou konesans ke-w’ genyen nan Pawòl la konsènan grandè-L’ ki san limit.
Sa-w’ konnen se li ki pral detèmine ak ki degre ke-w’ ka fè Bondye konfyans. Sa-w’ konnen de pwisans Bondye pral detèmine fason-w’ konsevwa Bondye. Sa-w’ konnen se mwayen atravè-l’ ke-w’ ka fè Bondye konfyans.
Tout sa-w’ pa konnen, ou p’ap janm kwè-l’. Li p’ap janm devni yon reyalite nan lavi-w’.
Sa pral detèmine pèspektif oubyen tandans ou anvè-L’. Konesans ke-w’ genyen vin reprezante yon chanèl a travè li menm Bondye ap relache pwisans Li nan lavi-w’.
Si chanèl konesans ou, pespektif ou de Bondye gwosè yon tiyo, pwisans Bondye ap manifeste nan lavi-w’, atravè ministè-w’ selon gwosè tiyo sa-a. Pwisans Li ap manifeste nan lavi-w’ nan degre ou konnen oubyen konprann Bondye.
Ebyen, si ou pa limite grandè Bondye atravè pwòp pèspektif ou ak sa ke ou ap atann de Li menm nan sans ke-w’ dakò pou bay Bondye chans pou-L’ kapab ye nan lavi-w’ tout sa ke-L’ ye kòm Bondye siprèm ki gen tout pouvwa, Bondye ki SE SA-L’ YE-a, ou kreye yon atmosfè pou Bondye manifeste grandè-L’ nan lavi-w’ nan yon lòt dimansyon.
Ou pa sipoze pran yon Bondye ki toupwisan, k’ap renye sou tout bagay, ki pa manke anyen, Bondye ki domine enposibilite epi ou kwense-L’ atravè pwòp fason-w’ panse ki se yon pwodwi reyalite mond sa ki limite. Ou ap limite Bondye atravè kapasite ak abilite ki limite.
Anplis, ou ap limite yon Bondye ki san limit atravè yon pèspektif ki baze oubyen ki fasone pa yon reyalite ki limite oubyen yon reyalite ke Bondye gen kontwòl sou li deja. Yon reyalite ki devni sa-l’ ye-a akoz Bondye pèmèt li.
Sa vle di, menm reyalite ke-w’ kite ap domine panse-w’, Bondye gen kontwòl sou li.
Konsa tou, gen yon seri domèn nan lavi-w’, ou konprann Bondye mal.
Gen yon gran koneksyon ant dimansyon pwisans Bondye ka manifeste nan lavi-w’ ak sa-w’ konnen. Bondye ap travay nan lavi-w’ selon sa-w’ konnen de Li menm ak sa-w’ vle konnen de Li menm.
Bondye pa ka ale nan yon dimansyon ke-w’ pa kwè ke-L’ ka ale avè-w’, nan yon dimansyon ke-w’ pa kwè ke-l’ posib. Bondye pa ka beni-w’ nan yon dimansyon ke-w’ pa kwè ke-L’ ka beni-w’.
Se pa jis konesans lan sèlman ki pral detèmine kòman ou wè oubyen sezi grandè Bondye, men pwofondè konesans ke-w’ genyen ak atitid ou anvè konesans sa.
—————– Note —————–
Bondye vle travay nan lavi-w’ atravè sa ke-w’ konnen de Li menm atravè Pawòl Li.
Men dyab la li menm vle bloke-w’ swa pou pa konnen yon seri bagay ki ka pèmèt ou fonksyone nan dimansyon Bondye dezire pou ou fonksyone, swa pou pa bay enpòtans ak sa-w’ gen tan konnen ki ka fè yon diferans nan lavi-w’, oubyen swa pou ou pa mete an aplikasyon sa-w’ konnen.
Dyab la li menm ap eseye limite-w’ atravè pwòp endiferans ou anvè reyalite spirityèl, atravè inyorans ou ki baze sou yon mank konesans, ak neglijans ou ki baze sou ou menm ki fayi fè sa ke Bondye vle pou-w’ fè nan lè pou fè sa.
Leson: Mande pou Bondye ba ou konesans ak konpreyansyon pou kapab konprann grandè-L’ pi plis.
Non sèlman pou ou konprann, men pou ou kapab mennen yon vi ki depann sou grandè-L’ ki san mezi.
Yon vi kote-w’ anbrase grandè-L’ kòm reyalite ki dwe gouvène lavi-w’ kèlkeswa jan sa ye.
Chanje Mantalite-w’ Anve Grande Bondye
Espri korido ka selman konsevwa reyalite ki nan degre ave-l’. Nan menm degre ak dimansyon ke Bondye se Bondye Ayisyen-an se menm jan ke-L’ se Bondye Blan.
Menm jan ke Bondye bay Blan gwo vizyon ki rann ke y’ap enpakte vi milye ak milyon moun, se menm bagay ke-L’ ka fe pou Ayisyen-an tou.
Konklizyon
- Li vin yon kesyon de sa-w’ konnen.
- Lafwa-w’ nan sa-w’ konnen.
- Ak volonte-w’ pou-w’ aplike sa-w’ konnen.